*Wataka
yote yenye utata ielekwe bungeni kujadiliwa
*Wapinzani
wataka juhudi za Magufuli ziungwe mkono
Mwandishi Wetu
 |
| Rais John Magufuli |
WAKATI agizo la Rais John Magufuli
kutaka liundwe jopo la kupitia sheria zote za madini na kuzipeleka bungeni ili
zipitishwe likisubiri utekelezaji, baadhi ya wanasiasa wametaka mikataba yote
mikubwa inayoingiwa na Serikali ipelekwe katika chombo hicho cha kutunga
sheria.
Wakizungumza jana kwa nyakati tofauti na
JAMBO LEO, walisema Taifa limeingia mikataba mingi yenye utata inayoweza kuzua
sintofahamu, kama ilivyokuwa kwa mikataba na sheria za madini wakitaka jambo
hilo lifanyike mapema ili kukwepa wizi na unyonyaji unaofanywa na baadhi ya
wawekezaji.
Jumatatu wiki hii, Rais Magufuli alipokea
ripoti ya pili ya Kamati aliyoiunda kuchunguza masuala ya kisheria na kiuchumi
kuhusu mchanga wa madini unaosafirishwa nje, kuagiza kupitiwa kwa sheriza zote
za madini na kutaka zipelekwe bungeni, jambo ambalo limepongezwa na watu
mbalimbali.
Tayari kampuni ya Acacia ambayo imetajwa
katika ripoti hiyo kulitia hasara Taifa ya Sh trilioni 108.06 imekubali kukaa
meza moja na Serikali na kufungua njia ya mazungumzo.
Mwenyekiti wa Barrick Gold Corporation
ambayo ni mmliki mkubwa wa kampuni ya Acacia, Profesa John Thornton, juzi alikutana na Rais Magufuli, Ikulu na
kukubali kukaa pamoja na Serikali kuzingatia maslahi ya pande zote na kuwa
tayari kulipa fedha zote inazopaswa kuilipa Tanzania.
“Suala hapa si mikataba ya madini pekee.
Anapaswa kuruhusu mikataba yote yenye maslahi ya nchi ipelekwe bungeni. Katika
hili tunamwomba sana Rais kutekeleza, maana tayari ameshaonesha utashi wa
kisiasa, anachokipigania ni malengo ya wengi, ikiwemo CCK,” alisema Constatine
Akitanda, Mwenyekiti wa Chama Cha Kijamii (CCK).
Kwa mujibu wa ripoti ya Kamati hiyo, mikataba
ya madini iliyoingiwa tangu mwaka 1998
ndiyo iliyosababisha upotevu wa kiasi hicho cha fedha, ambazo zingetumika katika bajeti ya miaka
mitatu.
Kwa hali hiyo, ilitoa mapendekezo 21,
ikiwa ni pamoja na kuwachukulia hatua Dk Abdallah Kigoda (marehemu), Daniel
Yona, Nazir Karamagi, William Ngeleja na Profesa Sospeter Muhongo ambao waliwahi
kushika nafasi za uwaziri wa nishati na madini kwa vipindi tofauti.
Wengine ni wanasheria wakuu wa zamani na
manaibu; Andrew Chenge, Johnson Mwanyika, Felix Mrema na Sazi Salula.
Wamo pia makamishina wa madini na wakuu
wa idara ya mikataba wa zamani; Paulo Masanja, Ally Samaje, Dk Dalaly Kafumu,
Maria Ndossi na Julius Malaba.
Katika maelezo yake, Akitanda alisema: “Unakumbuka
hapa watu walikunja twiga na kuwasafirisha bila ushahidi kupatikana, tumeona
utayari wake, tuko tayari kumsaidia kwani maendeleo ni kwa watu wote, yapo
mataifa yanamtukana ila kwa hili lazima Acacia watubu.”
Katibu Mkuu wa chama cha Tanzania Labour
(TLP), Nancy Mrikaria alisema ni wakati mwafaka kwa mikataba yote kufika
bungeni ili ipitiwe ili kunufaisha wananchi wote.
Alisema Rais Magufuli ameonesha utofauti
tangu aingie madarakani, hivyo dhamira yake itaonekana zaidi kama atakubaliana
na mapendekezo hayo kwani ni dhahiri mikataba ina changamoto nyingi.
“Ukiwa mpinzani si lazima upinge kila
kitu, hivyo kwa hili linapaswa kupongezwa na ndiyo maana tunamshauri aruhusu
mikataba yote ipite bungeni ili dhamira ya Rais iweze kuonekana kivitendo,” alisema.
Katibu Mkuu wa NCCR-Mageuzi, Danda Juju alisema
hatua anazochukua Rais kwa sasa ni ishara tosha kuwa ameanza kutekeleza madai
ya wapinzani ambao wamekuwa wakililia Katiba mpya ambayo itaonesha aina ya
uongozi wa nchi.
“Suala analofanya Rais ni sahihi na
lisiishie hapo liende mbali kwa kuhakikisha mikataba kama ya maliasili ambayo
inalalamikiwa, ifikishwe bungeni kwa maslahi ya nchi,” alisema.
Alisema kinachohitajika ni haki
kutendeka kwa kila upande ambayo itakuwa inahusika katika mabadiliko hayo ili
kuepusha mgogoro kwa pande zinazokinzana.
Mwenyekiti wa Umoja wa Wanawake wa Chama
cha Wananchi (JUKECUF), Severine Mwijage alisema mapendekezo ya Rais ndiyo
wamekuwa wakiyapigania miaka yote, hivyo uamuzi huo ni sahihi ila isiwe mikataba
hiyo pekee.
Mwijage ambaye ni Mbunge wa Viti Maalumu,
alisema yote yanayotokea sasa yanachangiwa na mikataba mibovu, ila kila wakati
wamekuwa wakionekana kuwa wanapiga kelele za chura.
Alisema kimsingi suala la uvunjaji
mikataba si jambo rahisi, lakini kupitia upya ni hatua muhimu kwa maslahi ya
nchi, hivyo ikifika wataipitia ili iendane na hitaji la nchi.
“Mikataba yote ni mibovu hivyo anapaswa
kuleta yote kama ana nia ya kusaidia Watanzania kupiga hatua kiuchumi, lakini
kama anafanya propaganda hakutakuwa na tija,” alisema.
Mjumbe wa Kamati Kuu ya Chadema, Profesa
Mwesiga Baregu alisema pamoja na kupeleka mikataba bungeni, kinachohitajika ni
kuwa na sera moja ambayo inazungumzia uvunwaji wa rasilimali za nchi.
Profesa Baregu alisema pia dhana hiyo
itafanikiwa iwapo Katiba mpya hasa ile ya Jaji mstaafu Joseph Warioba ndiyo
mkombozi wa rasilimali za nchi.
“Mimi nadhani upo umuhimu wa kuzungumzia
sera ya uvunaji rasilimali za nchi upya na hili lipewe nguvu na Katiba kama
Watanzania walivyokuwa wamependekeza katika Katiba ya Warioba,” alisema.
Alisema wananchi wamekuwa wakisisitiza
uwepo wa sheria ambazo zinatunza na kulinda rasilimali za nchi na kutoa rai kwa
wananchi kuachana na dhana ya kushambuliana.
Naibu Katibu Mkuu wa Chama cha
ACT-Wazalendo, Msafiri Mtemelwa alisema anaamini kila sekta ina udhaifu, hivyo
ni vema Rais akaangalia mikataba yote na isiwe ya madini pekee.
“Sisi ACT tumekuwa tukisema ukweli kila
mara kuhusu rasilimali za nchi, naamini tukiwa hivyo wote hakuna kitakachoshindikana,”
alisema.
0 comments:
Post a Comment