Seif Mangwangi, Arusha
HALI ya afya ya mbunge wa Jimbo la Arusha Mjini Godbless Lema (Chadema),
inaelezwa kuwa mbaya baada ya kugoma
kula kwa siku nne sasa tangu alipokamatwa na polisi jijini hapa akituhumiwa kwa
uchochezi.
Akizungumza na JAMBO LEO jijini hapa jana Meya wa Jiji la Arusha,
Calist Lazaro alisema licha ya kushawishiwa na viongozi wa chama hicho,
viongozi wa dini hata mke wake mbunge huyo hakubadili uamuzi wake wa kugoma
kula.
Lazaro alisema Lema amegoma kula kutokana na hasira alizonazo nazo
kufuatia kukamatwa akiwa ndani kwake akijiandaa kuelekea polisi baada ya kupewa
agizo la kufika kituoni hapo na Mkuu wa Upelelezi Mkoa.
"Sisi kama chama tumejaribu kuzungumza na Lema kumsihi ale
lakini amegoma, amekuja mke wake bado amegoma, hata viongozi wa dini wamekuja
bado amekataa kula," alisema.
Alibainisha kwamba anachosisitiza Lema ni kuendelea na mgomo huo
huku akifanya ibada kwa madai ya kudhalilishwa mbele ya familia yake kama mwizi.
Meya Kalist alisema kwa nafasi yake alijaribu kuwasihi polisi kumwachia
mbunge huyo ajumuike na familia yake ili aweze kula na kuokoa afya yake na
kuripoti kituoni hapo kulingana na maagizo atakayopewa. lakini polisi
wamemkatalia.
Alisema Lema alikamatwa Alhamisi ilitiopita na kuwekwa mahabusu ya
polisi huku akinyimwa haki yake kimsingi ya dhamana kwani hata kosa
analotuhumiwa nalo linadhaminika kisheria.
"Kama Chadema tumewataka polisi kumfikisha mahakamani Lema kesho
na kama watakaidi, asubuhi wanasheria wetu wanaoongozwa na Tundu Lissu na John
Mrema wataenda mahakamani kuomba kibali cha mahakama kushinikiza polisi
wamfikishe mahakamani mbunge wetu,"alisema Meya Lazaro.
Alipoulizwa kama amezungumza na Kamanda wa Polisi Mkoa wa Arusha,
Meya Lazaro alisema kesi hiyo iko chini ya Mkuu wa upelelezi Mkoa wa Arusha
hivyo Kamanda wa Mkoa hahusiki na dhamana ya Lema
Alipotafutwa kuzungumzia tukio hilo Kamanda wa Polisi Mkoa wa
Arusha Charles Mkumbo alikiri mbunge
huyo kugoma kula lakini akasema: “Hatuna namna ya kumshiniza ale kwani amekataa.
Lakini tumemweleza anachofanya pia ni kosa kisheria, Kugoma kula ni kosa.”
Alipoulizwa
kama mbunge huyo atafikishwa lini mahakamani Kamanda Mkumbo alisema: Hatuna
hakika ni lini, hivyo hatuwezi kuseme kama ni kesho.”
0 comments:
Post a Comment