MAHAKAMA
ya Hakimu Mkazi ya Mkoa wa Arusha
imesimama kwa muda baada ya Mbunge wa Arusha Mjini, Godbless Lema,
kupandishwa kizimbani kwa mara ya kwanza huku amedhoofu.
Lema
alifikishwa mahakamani hapo jana baada ya kushikiliwa kwenye mahabusu ya Polisi
kwa takribani siku nne.
Hata
hivyo, tafrani nyingine iliibuka baada ya askari waliopandisha kizimbani kutaka
kumpeleka Magereza baada ya kutokidhi masharti ya dhamana aliyopewa na baada ya nyaraka za wadhamini wake kutokuwa
sahihi.
Mbunge
huyo machachari alisomewa mashitaka mawili yaliyokuwa yakimkabili mbele ya
Hakimu
Mkazi, Desdery Kamugisha huku upande wa Serikali ukiwakilishwa na Mwanasheria
Innocent Njau.
Akimsomea
mashitaka yake mahakamani hapo, Mwendesha Mashitaka wa Serikali, Njau alidai
kuwa Agosti 20, Mbunge huyo alimtumia ujumbe mfupi wa maneno Mkuu wa Mkoa wa
Arusha, Mrisho Gambo akitumia namba 0764150747 kwenda namba 0766 757575 ya Mkuu
huyo.
Ujumbe
huo kwa mujibu wa mashitaka ulikuwa ukisomeka: “Karibu tutakudhibiti kama
mashoga wanavyodhibitiwa Uarabuni".
Katika
mashitaka ya pili, Njau alidai kuwa Lema alitumia mtandao wa WhatsApp
kushawishi wananchi wa Arusha kuandamana
Septemba mosi.
Baada
ya kusomewa mashitaka hayo, Lema alikana
ndipo mwendesha mashitaka wa Serikali akaiomba Mahakama imnyime dhamana
kwa sababu kuna taarifa za kiintelijensia kuwa akipewa usalama wake utakuwa
shakani.
Hata
hivyo hoja hiyo ilipingwa na wakili wa utetezi, John Mallya ambaye alimwomba
Hakimu Kamugisha kumpa dhamana Lema, kwa sababu kosa lake linaruhusu dhamana na
pia ni mbunge hivyo taarifa za kiitelijensia hazina uzito na kama zipo
zinapaswa kutajwa mahakamani ili imnyime dhamana.
"Tunaomba
pingamizi hili la dhamana litupiliwe mbali maana hakuna ushahidi wa maandishi
wala kutamkwa mahakamani hapa, kama Lema akipewa dhamana anaweza kuhatarisha
usalama wake, tunaomba apewe dhamana,” Wakili Mallya aliomba.
Baada
ya mabishano hayo, Hakimu Kamugisha alitupilia mbali pingamizi la mwanasheria
wa Serikali, na badala yake alitoa masharti ya dhamana kwa mbunge huyo, ambaye
alipaswa kuwa na wadhamini wawili watakaosaini hati ya Sh milioni 10, kila
mmoja kwa kiasi hicho hicho na pia mbunge huyo asiruhusiwe kutoka nje ya nchi
bila ruhusa ya Mahakama na kutakiwa kusalimisha hati yake ya kusafiria
mahakamani hapo.
Baada
ya masharti kutolewa wadhamini wawili walijitokeza ambao ni madiwani jijini
hapa, lakini karatasi zao zilionekana kuwa na kasoro baada ya mwanasheria wa
Serikali kuzikagua hasa majina.
“Hati
za wadhamini zina kasoro katika majina kwenye vitambulisho vilivyowasilishwa
mahakamani hapa vinaonesha majina matatu lakini barua zinaonesha majina mawili,
la mwanzo na la mwisho hivyo naiomba Mahakama isipokee barua hizi,” aliomba.
Kutokana
na sintofahamu hiyo, Hakimu Kamugisha alikubaliana na hoja ya Wakili Njau na
kumtaka Lema atafute wadhamini wengine na kuahirisha kesi hiyo hadi Septemba 19.
Katika
mashitaka ya pili ya kuhamasiaha maandamano Agosti mosi hadi 26 alikana pia na
Mallya kuomba dhamana ambapo wakili wa Serikali hakuwa na pingamizi huku akiondoa hoja yake
ya awali aliyoitumia kupinga dhamana ya Lema.
Kwa
mara nyingine Hakimu Kamugisha alitoa masharti
kwa mbunge huyo kuwa na wadhamini wawili watakaosaini bondi ya Sh milioni 15 kila
mmoja na kuahirisha kesi hiyo hadi
Septemba 13 huku akitoa amri kwa
wadhamini kushughulikia kasoro ya awali kabla ya muda wa Mahakama kumalizika.
Baada
ya kesi hizo kuahirishwa Lema alipelekwa
mahabusu kwa muda ili kusubiri wadhamini wake kurekebisha kasoro
zilizojitokeza.
Saa
8:20 mchana, polisi walimtoa mahabusu na kutaka kumpandisha kwenye karandinga
kwa ajili ya kumpeleka mahabusu ya Kisongo.
Hata
hivyo, yaliibuka mabishano kati ya Lema na askari hao na mawakili Mallya na
James Lyatuu ambao kwa pamoja walihoji, mbunge huyo anakopelekwa wakati
akisubiri kurekebishwa kwa hati ya dhamana na muda wa Mahakama ulikuwa bado
haujamalizika.
“Muda
wa mahakama haujafika mnanipeleka wapi nasema, nitafia hapa mahakamani saa hizi
ni saa 8 muda wa Mahakama haujaisha mnanipeleka wapi siendi mniue, siendi
popote mniue hapa hapa, mnanipeleka wapi
na kwa nini mnanifanyia hivi nasema siendi kokote bora kufa sikubali,"
alisikika Lema akipaza sauti.
Lema
ambaye alionekana kudhoofu kutokana na kugoma kula kwa siku nne, aliweza
kuwakimbia askari hao na kuingia ndani
ya vyumba vya Mahakama hali iliyofanya
polisi kupambana naye hata akaanguka chini kwa muda huku polisi wakimzingira na
ndugu, jamaa na marafiki wakishuhudia
tukio hilo.
Baada
ya muda huku tafrani hiyo ikiendelea, wadhamini wake Isaya Doita, Paulo Matsei,
Sabina Francis na Naibu Meya wa Jiji la
Arusha, Viola Lekindikoki walijitokeza na kufanikiwa kumdhamini na kuondolewa mahakamani hapo akiwa amebebwa
kwa kukosa nguvu huku akipanda gari aina ya Toyota Harrier na kukimbizwa hospitali
ya Aga Khan kwa matibabu.
0 comments:
Post a Comment